Bakit Parang Ghost Town ang Facebook Dito sa Japan?

Napansin mo ba? Parang ang tahimik ng mga Hapon mong kaibigan sa Facebook, 'no?

Anyare sa Facebook Japan?

Kung isa ka sa mga nag-add ng mga katrabaho mong Hapon sa Facebook, baka napansin mo rin. Bihira sila mag-post. Minsan, birthday notification na lang ang nagpapaalala sa'yong may account pa pala sila. Diba?

Noong una, sikat ang Facebook sa mga 'tito' at 'tita' age group dito sa Japan, lalo na sa mga business professionals. Pero ngayon, parang nag-aalisan na rin daw sila.

Ang dahilan? Yung timeline daw nila, napuno na ng mga kung ano-anong ads na mukhang scam, mga post galing sa mga di nila kilala, at mga video na di naman nila hinahanap. Nakakaumay daw, kaya marami na ang nag-log out for good.

Habang tayo, bawat kibot may life update at chismis. Sa kanila, ang Instagram at X (dating Twitter) na ang go-to para sa personal posts, at LinkedIn naman para sa mga professional connections. Naiwan ang Facebook na parang abandonadong party. 😬

Ayon sa Datos...

At hindi lang ito haka-haka, may numbers na nagpapatunay. Sa Japan, ang ad reach ng Facebook ay nasa 16.5 million na lang.

I-compare mo 'yan sa X (71.2M), Instagram (63.2M), at kahit sa TikTok (39.2M). Ang layo ng agwat! Kahit nga yung bagong-labas na Threads, humahabol na sa 13 million users.

Sa buong mundo, malakas pa rin ang Facebook, mahigit 3 billion users. Pero dito sa Japan, at sa maraming bansa, 'di na siya trip ng mga kabataan. Yung mga teenager na user sa US, nangalahati na raw sa loob ng 8 taon.

Kaya ayun. Ang dating social network, nagiging parang isang 'overgrown class reunion' na lang na iilan na lang ang uma-attend. Buti na lang masaya pa rin sa Pinoy Facebook.