Tax Refund sa Padala: Baka Nagsasayang Ka ng Pera
Alam mo ba, yung pag-declare mo ng dependents sa Nenmatsu Chousei, baka walang silbi 'yan.
Anong Problema?
Tuwing November, binibigay 'di ba ng company yung form para sa "Year-End Tax Adjustment" or Nenmatsu Chousei. Dahil nagpapadala ka sa pamilya sa Pinas, sinusulat mo sa "dependents" section kung ilan sila. Akala mo, bababa na tax mo. Mali.
Dalawang taon ko ring ginawa 'to. Sabi ko sa sarili ko, tama naman ginawa ko. Pero tinitingnan ko yung payslip ko, hindi naman nababawasan yung tax. Akala ko baka ganun lang talaga. Yun pala, ilang sampung libong yen na yung nasasayang ko bawat taon. Hindi kasi basta-basta naniniwala ang tax office sa simpleng sulat mo lang.
Bakit Ganyan?
Hinigpitan kasi nila yung rules ilang taon na ang nakalipas. Dati daw madali lang. Pero ngayon, kailangan mong patunayan na binubuhay mo talaga yung pamilya mo sa Pinas.
Kung iisipin mo, may sense naman. Para iwas-daya. Kaya dalawang bagay ang kailangan mong i-prove: una, na totoong kamag-anak mo sila, at pangalawa, na totoong nagpadala ka ng pera sa kanila. Kailangan pareho, hindi pwedeng isa lang.
So, Anong Gagawin?
Dalawang klase ng papel ang kailangan mo i-submit sa company mo kasabay ng Nenmatsu Chousei form: "shinzoku kankei shorui" (proof of relationship) at "soukin kankei shorui" (proof of remittance).
Ang "proof of relationship" ay mga dokumento tulad ng birth certificate galing sa Pinas. Kailangan mo rin ng Japanese translation. Ang good news, minsan mo lang 'to kailangan ihanda.
Ang medyo hassle ay yung "proof of remittance". Ito yung patunay na nagpadala ka ng pera sa bawat isang dependent mo para sa taon na 'yon. Pwedeng resibo ng bank transfer, o kahit credit card statement na gamit ng pamilya mo. Importanteng itago mo 'to every time na magpapadala ka.
Medyo abala sa umpisa, oo. Pero isipin mo, depende sa sahod mo at dami ng dependents, pwede kang makatipid ng 50,000 hanggang 100,000 yen sa isang taon sa income tax at residence tax. Once na makuha mo yung sistema, uulitin mo na lang bawat taon. Sulit yung pagod. ☕