जापानबाट बाहिरिन अब ३ गुणा महँगो

अब जापानबाट छुट्टीमा घर जाँदा पनि सरकारलाई ३ हजार येन तिर्नुपर्ने भयो।

के भयो यस्तो?

जुलाई १ देखि जापान सरकारले देशबाट बाहिर जाने हवाईजहाजको टिकटमा लाग्ने 'Departure Tax' तीन गुणा बढाएको छ।

पहिले यो कर प्रति व्यक्ति १,००० येन थियो, जुन थाहै नपाई टिकटको पैसामा जोडिएको हुन्थ्यो। अब यो बढेर ३,००० येन (लगभग २,५०० नेपाली रुपैयाँ) पुगेको छ। एक जनाको लागि २,००० येन थपिनु ठूलो कुरा नलाग्न सक्छ, तर परिवारसँग छुट्टीमा जाँदा हिसाब गर्दा अलि तनाब नै हुन्छ। 😥

किन यस्तो?

सरकारको भनाइ अनुसार, जापानमा पर्यटकको भीडभाड (overtourism) बढेकाले त्यसलाई व्यवस्थापन गर्न यो पैसा प्रयोग गरिनेछ रे। पर्यटकहरूलाई टोकियो, ओसाका जस्ता ठाउँमा मात्र नभई कम चिनिएका ठाउँहरूमा पठाउन र पर्यटकीय स्थलहरूमा सुविधा बढाउन यो रकम खर्च हुनेछ।

सुन्दा त राम्रै लाग्छ, तर कुरा अर्कै छ।

अनि हामीलाई के मतलब?

यो कर पर्यटकहरूले मात्र तिर्नुपर्ने होइन। जापानबाट बाहिर जाने हरेक व्यक्तिले तिर्नुपर्छ — चाहे त्यो जापानी नागरिक होस् वा हामी जस्ता विदेशी बासिन्दा।

मतलब, तपाईंले दुःख गरेर कमाएको पैसाले दशैं-तिहारमा नेपाल जाने टिकट काट्दा, तपाईंले पनि यो 'पर्यटक व्यवस्थापन' कर तिरिरहनुभएको हुन्छ। घुम्न आउने पर्यटकको समस्या समाधान गर्न जापानमा बसेर काम गर्ने हामीले नै पैसा तिर्नुपर्ने! कस्तो राम्रो विचार है? 😂

हरेक कुराको भाउ बढिरहेको बेला, घर जान पनि थप पैसा तिर्नुपर्ने। खैर, जापानमा बसेपछि यस्तै त हो नि।