जापानमा तलब किन बढ्दैन? कारण हामी पो रहेछौं।

जापानको पत्रिकाले हिसाब गरेरै देखायो, कम्पनीहरूले हामीलाई काममा राखेर कति पैसा बचाउँछन् भनेर।

कुरो के हो?

हालै जापानको एउटा अनलाइन पत्रिकाले एउटा लेख छापेको छ जसमा भनिएको छ, 'सस्तो विदेशी कामदार' को कारणले 'मेहनती जापानी' हरूको तलब बढिरहेको छैन। यो पढेर एकछिन त अचम्म लाग्छ, तर उनीहरुले तथ्याङ्क नै देखाएका छन्।

रिपोर्ट अनुसार, जुन क्षेत्रमा विदेशी कामदार धेरै छन्, त्यहाँ जापानीहरूको तलब वृद्धि रोकिएको छ। उदाहरणको लागि, रेस्टुरेन्ट र होटल क्षेत्रमा विदेशीहरूको संख्या सबैभन्दा धेरै छ, र त्यहाँ विगत ५ वर्षमा वास्तविक तलब ४.२% ले घटेको छ। घट्यो रे! 🤔

त्यस्तै, विदेशी धेरै भएको टोकियोभन्दा विदेशी लगभग नभएको आकिता प्रान्तमा न्यूनतम ज्याला धेरै बढेको देखियो। यसले के देखाउँछ भने कम्पनीहरूले तलब बढाउनुको सट्टा सस्तोमा विदेशी कामदार राख्न सजिलो मानिरहेका छन्।

हिसाब-किताब कस्तो छ?

लेखमा एउटा गज्जबको हिसाब देखाइएको छ। मानौं, एउटा कम्पनीमा २० जना जापानी काम गर्छन् र अर्को त्यस्तै कम्पनीमा १३ जना जापानी र ७ जना 'तोकुतेइ गिनोउ' भिसाका विदेशी काम गर्छन्।

हिसाब अनुसार, कम्पनीले एक जना जापानी कर्मचारीमाथि वर्षमा लगभग ५४ लाख ७० हजार येन खर्च गर्छ। तर, एक जना विदेशी कर्मचारीमाथि उसको भिसा प्रक्रिया, सपोर्ट कम्पनीको शुल्क सबै जोड्दा पनि जम्मा ३८ लाख ५० हजार येन मात्र खर्च हुन्छ।

यसको मतलब, कम्पनीले एक जना विदेशी राख्दा एक जना जापानीको तुलनामा वर्षको १६ लाख येनभन्दा बढी बचाउँछ। यो फरकको मुख्य कारण 'स्थायी रोजगारी' हो। जापानी कर्मचारीको तलब हरेक वर्ष बढ्छ, बोनस, रिटायरमेन्ट फन्ड थपिँदै जान्छ। तर विदेशीहरूको भिसा ५ वर्षको हुन्छ, त्यसपछि फेरि नयाँ प्रक्रिया सुरु हुन्छ। हाम्रो तलबको मिटर ५ वर्षमा रिसेट हुन्छ जस्तै भयो।

अनि हामीलाई के त?

यसरी कम्पनीहरूले सस्तोमा कामदार पाउँदा, उनीहरूलाई तलब बढाउनुपर्ने दबाब नै हुँदैन। जापानीहरूले तलब नबढेपछि काम छोड्छन्, अनि कम्पनीहरू 'मान्छे पुगेन, मान्छे पुगेन' भन्दै सरकारलाई गुहार्छन्। अनि सरकारले फेरि विदेशी कामदार ल्याउने बाटो खोलिदिन्छ।

लेखकले यसलाई 'आय स्थानान्तरण' भनेका छन्—अर्थात्, जापानी कामदारले पाउनुपर्ने पैसा घुमाउरो पाराले कम्पनी मालिकको खल्तीमा गइरहेको छ। र यो प्रक्रियामा हामी विदेशी कामदारहरू एक माध्यम बनिरहेका छौं।

त्यसैले, अर्को पटक कोहीले 'हितोबुसोकु' (人手不足) भन्दा, सायद 'सस्तोमा काम गर्ने मान्छे पुगेन' भन्न खोजेको हो कि भनेर सोच्नुपर्ला।