जापानी किशोरकिशोरीको सपना: YouTuber देखि सरकारी जागिरसम्म

जापानमा हाई स्कूलका केटाकेटी दुवैको पहिलो रोजाइको पेशा सरकारी जागिरे बन्ने रहेको छ।

के हो यो सर्वेक्षण?

सोनी लाइफ इन्स्योरेन्सले हालै जापानका मध्य र उच्च माध्यमिक तहका विद्यार्थीहरूमाझ एउटा रमाइलो सर्वेक्षण गरेको थियो। उनीहरूलाई सोधियो, "तिमीहरू ठुलो भएपछि के बन्न चाहन्छौ?"

मध्य विद्यालय (चुगाक्को) का केटाहरूको सपना त गज्जवकै थियो। पहिलो नम्बरमा 'IT इन्जिनियर/प्रोग्रामर', अनि 'कम्पनीको साहु/उद्यमी' र 'YouTuber' बन्ने होडबाजी। केटीहरू पनि कम छैनन्, उनीहरूको सपना 'गायिका/अभिनेत्री/आवाज कलाकार' बन्ने छ, जुन लगातार तीन वर्षदेखि पहिलो नम्बरमा छ। 🎨

तर हाई स्कूल पुगेपछि...

रमाइलो त अब सुरु हुन्छ। मध्य विद्यालयमा ठूला-ठूला सपना देख्ने तिनै विद्यार्थीहरू हाई स्कूल पुग्ने बित्तिकै अचानक गम्भीर हुन्छन्। केटा र केटी दुवैको पहिलो रोजाइ बन्छ - 'सरकारी जागिर' (公務員 - koumuin)।

कारण सोध्दा जवाफ पनि उस्तै 'जापानिज' पाराको थियो: "जागिरबाट निकाल्ने डर हुँदैन", "स्थिर तलब आउँछ", "सुविधाहरू राम्रो हुन्छ।" लाग्छ, यहाँको हावापानीमै 'स्थिरता' पहिलो प्राथमिकता हो। रमाइलो कुराभन्दा पनि सुरक्षित भविष्य महत्वपूर्ण लाग्ने रहेछ।

विवाह र बच्चा नि?

सर्वेक्षणले भविष्यको योजनाबारे पनि सोधेको थियो। विवाह गर्ने र बच्चा जन्माउने चाहना दुवै घट्दो क्रममा देखियो। विशेषगरी हाई स्कूलका केटीहरूमा यो प्रवृत्ति बढी छ, जहाँ करिब ३०% ले भविष्यमा बच्चा नचाहने बताए।

सायद यही कारणले पनि होला, उनीहरू 'स्थिर' जागिरलाई यति धेरै महत्व दिन्छन्। परिवारको जिम्मेवारीभन्दा पहिले आफू आर्थिक रूपमा सुरक्षित हुने सोचाइ बलियो बन्दै गएको देखिन्छ।

आजकल के चल्दैछ?

जापानी किशोरकिशोरीहरू अहिले 'वाहो' (ワホー) भन्ने शब्द निकै प्रयोग गर्दा रहेछन्। कुनै YouTuber ले सुरु गरेको यो शब्द उनीहरू उत्साहित हुँदा प्रयोग गर्छन्। अब कसैले 'वाहो' भनेको सुनियो भने अचम्म नमान्नुहोला। 😉

उनीहरूको लागि सबैभन्दा ठूलो खुसीको कुरा केटाहरूको लागि 'गेम' र केटीहरूको लागि 'संगीत' र 'ओशिकाचु' (आफूलाई मनपर्ने कलाकार वा पात्रलाई समर्थन गर्ने काम) रहेछ।