धेरैबेर बस्दा क्यान्सर हुन्छ?

तपाईंको अफिसको कुर्चीले बिस्तारै तपाईंको ज्यान लिइरहेको हुन सक्छ।

कुरो के हो?

भर्खरै बेलायतमा भएको एउटा स्टडी पढेको, अब त मलाई कुर्चीमा बस्न पनि डर लाग्न थाल्यो। ९१,००० भन्दा बढी मान्छेमा गरेको १२ वर्ष लामो अध्ययनले के देखायो भने, धेरै बेरसम्म लगातार बस्ने मान्छेहरूमा क्यान्सरबाट मर्ने जोखिम ९% ले बढी हुँदो रहेछ।

अझ, हरेक एक घण्टा बढी बस्दा यो जोखिम १०% ले बढ्ने रे। सोच्नुस् त, जापानको अफिसमा ८-१० घण्टा बसेर फेरि ट्रेनमा एक घण्टा झुन्डिँदा के हाल हुन्छ होला। 😱

अनि अब के गर्ने त?

तर आत्तिनु पर्दैन, यसको समाधान म्याराथन दौडिनु पर्ने जस्तो गाह्रो छैन। त्यही स्टडीले के भन्छ भने दिनमा केवल एक घण्टा बस्ने समयलाई सामान्य हिँडडुल वा सानोतिनो कामले बदल्यो भने क्यान्सरको जोखिम १२% ले घट्छ।

मतलब, हरेक आधा-एक घण्टामा उठेर एकछिन कोठामा हिँड्ने, पानी लिन जाने, वा बेड मिलाउने जस्ता काम गरे पनि पुग्ने रहेछ। कम्पनीमा काम गर्दा पनि कफी लिन उठ्ने, वा आफ्नो सानो १K अपार्टमेन्टमा अलि बढी यताउता गर्ने। भ्याकुम लगाउनु पनि एक्सरसाइज नै हो नि, हैन र?