जापानको PR को लागि अब नयाँ जाँच पास गर्नुपर्ने?

जापानमा १० वर्षभन्दा बढी बसे पनि, अब PR को लागि छुट्टै जाँच पास गर्नुपर्ने हुन सक्छ।

के हुँदैछ?

जापानको अध्यागमन विभाग (Nyukan) ले एउटा नयाँ कार्यक्रम ल्याउने योजना बनाउँदैछ रे। नाम पनि कस्तो: "जापानी भाषा र जीवनशैली ज्ञान कार्यक्रम"।

यसको उद्देश्य हामी विदेशीहरूलाई जापानी भाषा, नियम-कानुन, र यहाँको संस्कृति सिकाउनु हो। मानौं हामी यतिका वर्षदेखि गुफामा बसिरहेका थियौं। 😉

मुख्य कुरा के हो भने, यो कार्यक्रम पूरा गर्नु स्थायी बसोबास (Permanent Residency - 永住権) को लागि अनिवार्य शर्त बन्नेछ। तपाईं १० वर्षभन्दा बढी बसिसक्नुभएको भए पनि यो लागू हुनेछ।

यति मात्र होइन, जापानको नागरिकता (帰化) लिने बेलामा पनि यो कार्यक्रममा तपाईंको सहभागिता र सिकाइको स्तरलाई हेरिनेछ।

किन यस्तो नियम?

कुरो के भने, जापानले युरोप र अमेरिकाको सिको गर्न खोजेको देखिन्छ। ती देशहरूमा आप्रवासीहरूले भाषा र सामाजिक ज्ञानको निश्चित स्तर पूरा गर्नुपर्छ।

अहिलेसम्म जापानमा विदेशीलाई सिकाउने काम स्थानीय सरकार वा कम्पनीहरूले आफ्नो तरिकाले गर्दै आएका थिए। अब सरकारले नै एउटै 'कोर्स' बनाउन लागेको हो।

यसको मतलब, अबदेखि कति वर्ष बस्यो भन्ने कुरा मात्र होइन, तपाईं जापानी समाजमा कत्तिको घुलमिल हुनुभयो भन्ने कुरा पनि नापिने भयो। गार्बेजको नियम कत्तिको बुझ्नुभएको छ भनेर जाँच लिने दिन नआउला भन्न सकिन्न।

अब के हुन्छ?

आत्तिहाल्नु पर्दैन, यो सन् २०२७ बाट मात्रै कार्यक्रमको तयारी सुरु हुने र २०२८ मा परीक्षणको रूपमा लागू हुने योजना छ।

तर एउटा कुरा के छ भने, सरकारले यो कार्यक्रम पूर्ण रूपमा लागू हुनुअघि नै PR वा नागरिकताको लागि आवेदन दिनेहरूलाई जापानी भाषाको निश्चित स्तर अनिवार्य गर्न सक्नेबारे पनि विचार गरिरहेको छ।

त्यसैले, हामीले दैनिक जीवनमा कोन्बिनिको स्टाफसँग बोल्दा वा ट्रेनको घोषणा सुन्दा सिकिरहेको जापानी भाषा अब आधिकारिक रूपमै जाँचिने दिन आउन सक्छ।