दिनको ५ कप कफीले कलेजो बचाउँछ रे

तपाईंले दिनहुँ पिउने त्यो कोन्बिनिको कफीले वास्तवमा तपाईंको ज्यान जोगाइरहेको हुन सक्छ।

आखिर कुरो के हो?

लामो सिफ्ट, ओभर टाइम, अनि फेरि बिहानै उठेर ट्रेन समात्नुपर्ने बाध्यता। यस्तो बेला कोन्बिनि वा भेन्डिङ मेसिनको कफीबाहेक अरू के नै सहारा हुन्छ र? तर सधैं कफी धेरै पिएर स्वास्थ्य बिग्रिन्छ कि भन्ने डर लाग्थ्यो। अब भने एउटा ठूलो अध्ययनले उल्टो कुरा देखाएको छ।

हालै सार्वजनिक एक अध्ययनअनुसार दैनिक कफी पिउँदा कलेजोको रोग र क्यान्सरको जोखिम निकै कम हुने देखिएको छ। अचम्मको कुरा त के छ भने, दिनमा ५ कप वा त्योभन्दा बढी पिउनेहरूलाई पनि यो फाइदा पुग्छ रे। मलाई त यो सुनेर Boss Coffee को क्यानलाई ढोग्न मन लाग्यो। 😂

कति पिउँदा कति फाइदा?

यो अध्ययन ३ लाख ५० हजारभन्दा बढी मानिसहरूमा १० वर्षसम्म गरिएको थियो। त्यसैले यो सानोतिनो गफ होइन। नतिजाहरू साँच्चै रोचक छन्।

दैनिक १-२ कप कफी पिउँदा कलेजो सिरोसिसको जोखिम २०% र कलेजो क्यान्सरको जोखिम २४% ले घट्ने देखियो।

दैनिक ३-४ कप पिउने हो भने त झन् राम्रो! कलेजो सिरोसिस र क्यान्सरको जोखिम ३५% ले कम हुन्छ, र कलेजोसम्बन्धी रोगबाट मृत्यु हुने सम्भावना ४१% ले घट्छ।

अनि दिनमा ५ कपभन्दा बढी पिउने मेरो जस्ता साथीहरूका लागि: कलेजो क्यान्सरको जोखिम ४७% र कलेजोसम्बन्धी मृत्युको जोखिम ४२% ले कम हुन्छ। अब त अफिसमा म्यानेजरले कफी धेरै पिएको देख्यो भने यो आर्टिकल देखाउनु पर्ला।

तर यो क्याफिनले गर्दा होइन

धेरैलाई लाग्न सक्छ, यो सब क्याफिनको कमाल हो। तर होइन। अध्ययनका अनुसार, यो फाइदा कफीमा पाइने एन्टिअक्सिडेन्टको कारणले हो। त्यसैले क्याफिन नभएको (decaf) कफीले पनि उस्तै काम गर्छ।

चिनी हालेको मीठो कफी पिउनेहरूको लागि पनि खुसीको खबर छ। चिनीले फाइदा अलिकति कम गरे पनि, जोखिम घटाउने असर भने कायमै रहन्छ। तर याद राख्नुस् है, यो अध्ययनले सम्बन्ध देखाएको हो, कफी नै अचुक औषधि हो भनेर प्रमाणित गरेको चाहिँ होइन। तैपनि, अर्को पटक कोन्बिनिमा कफी किन्दा अलिकति कम दोषी महसुस गर्न त पाइयो नि, हैन र? 😉