ဂျပန်အတိုးနှုန်းတက်ပြီ၊ ပိုက်ဆံအိတ်ပြင်ထားကြတော့

အသက် ၃၀ ကျော် အိမ်ရာချေးငွေရှိသူတွေ တစ်နှစ်ကို ယန်း ၄ သောင်းလောက် ပိုကုန်ကျနိုင်တယ်တဲ့။

ဘာတွေဖြစ်နေတာလဲ?

ဒီတစ်ပတ်ကတော့ ဂျပန်နဲ့ အမေရိကရဲ့ ဗဟိုဘဏ်တွေက ငွေကြေးမူဝါဒတွေ ဆုံးဖြတ်မယ့် "Central Bank Week" ပါပဲ။ အမေရိကန်က အတိုးနှုန်းမြှင့်တာ သေချာသလောက်ဖြစ်နေပြီး ဂျပန်ဗဟိုဘဏ် (Bank of Japan) ကလည်း 0.25% အတိုးနှုန်းထပ်မြှင့်ဖို့ အလားအလာ အရမ်းများနေပါတယ်။

ဒါဟာ ဂျပန်အတွက် ၃၁ နှစ်အတွင်း အမြင့်ဆုံးအတိုးနှုန်းဖြစ်လာမှာဖြစ်ပြီး ကျွန်တော်တို့ရဲ့ အိမ်ရာချေးငွေတွေ၊ ဘဏ်စာအုပ်ထဲက အပ်ငွေအတိုးနှုန်းတွေအပေါ် သက်ရောက်မှုရှိလာတော့မှာပါ။

ဘာလို့ဒီလိုဖြစ်ရတာလဲ?

အဓိကကတော့ ကုန်ဈေးနှုန်းကြီးမြင့်မှု (inflation) ကို ထိန်းချုပ်ဖို့ပါပဲ။ အရာရာဈေးတက်နေတာကို အရှိန်လျှော့ဖို့ ကြိုးစားနေကြတာပေါ့။ ဟိုဘက် အမေရိကမှာဆို ထရမ့်က ရွေးကောက်ပွဲနိုင်ရင် လူတိုင်းကို ဒေါ်လာ ၅၀၀၀ ပေးမယ်လို့ ကြေညာလိုက်လို့ ပိုပြီးတော့တောင် ငွေကြေးဖောင်းပွမှုကို ဖြစ်စေနိုင်တယ်ဆိုပြီး စိုးရိမ်နေကြပါတယ်။

နောက်တစ်ခုက ရေနံဈေးတွေပါ။ အရှေ့အလယ်ပိုင်းမှာ တိုက်ခိုက်မှုတွေဖြစ်နေတော့ ရေနံတင်ပို့တဲ့လမ်းကြောင်းတွေ ရပ်သွားပြီး ရေနံဈေးတွေက ထိုးတက်နေပါတယ်။ အဲ့ဒီဒဏ်က ကမ္ဘာပတ်ပြီး ဂျပန်က ဓာတ်ဆီဈေးတွေအထိပါ လာရိုက်ခတ်နေတာပါ။

ကျွန်တော်တို့နဲ့ ဘာဆိုင်လဲ?

အဓိက သက်ဆိုင်တာကတော့ အိမ်ရာချေးငွေ (住宅ローン) ရှိတဲ့သူတွေပါပဲ။ အထူးသဖြင့် ပြောင်းလဲအတိုးနှုန်း (変動金利) နဲ့ ချေးထားတဲ့သူတွေအတွက်ပါ။ အတိုးနှုန်း ၁% အောက်နဲ့ရတဲ့ variable rate တွေဆိုတာ အောက်တိုဘာလနောက်ပိုင်းမှာ သမိုင်းဖြစ်သွားနိုင်တယ်လို့တောင် ပြောနေကြပြီ။

ဒီတစ်ခါ အတိုးနှုန်းထပ်တက်ရင် အသက် ၃၀ အရွယ် ချေးငွေရှိသူတွေဆို တစ်နှစ်ကို ယန်း ၄၁,၀၀၀ (လေးသောင်းတစ်ထောင်) လောက် ပိုကုန်ကျမယ်လို့ ခန့်မှန်းထားပါတယ်။ လစဉ် နိုမိခိုင်းသွားဖို့ စုထားတဲ့ ပိုက်ဆံလေးတွေတော့ လေထဲလွင့်သွားပြီပေါ့။ 🥲

ချေးငွေတွေမှာ "5-year rule" ဆိုတာရှိတော့ လစဉ်ပေးရတဲ့ငွေက ချက်ချင်းမတက်လာသေးပေမဲ့ ကိုယ်ပေးနေတဲ့ထဲမှာ အတိုးက ပိုများသွားပြီး အရင်းက နည်းသွားမှာပါ။ ဆိုတော့ ချေးငွေကျေဖို့ အချိန်ပိုကြာသွားနိုင်တယ်ဆိုတဲ့ သဘောပါပဲ။ ရှေ့ဆက်ပြီး အတိုးနှုန်းတွေ ဘယ်လောက်မြန်မြန်တက်မလဲဆိုတာကိုတော့ ဗဟိုဘဏ်ဥက္ကဋ္ဌရဲ့ သတင်းစာရှင်းလင်းပွဲကို စောင့်ကြည့်ရမှာပါ။