တစ်ပတ်ကို ၁၀ မိနစ် ဆန့်ထုတ်ရုံနဲ့ လုံလောက်ပြီတဲ့။

ဒီလောက်နှစ်တွေ အကြာကြီး အချိန်ကုန်ခံပြီး အကြောဆန့်ခဲ့တာတွေ အလကားပဲလား... တစ်ပတ်ကို ၁၀ မိနစ်နဲ့တင် လုံလောက်တယ်တဲ့။ 🤯

တစ်ပတ်ကို ၁၀ မိနစ်ပဲလား

အရင်ကဆို အကြောဆန့်တယ်ဆိုရင် နာနာကျင်ကျင်နဲ့ အချိန်ကြာကြာလုပ်မှ ပျော့တယ်လို့ ထင်ခဲ့ကြတာလေ။ ဒါပေမဲ့ ဂျပန်က stretching နယ်ပယ်မှာ ကမ္ဘာ့နံပါတ် ၁ သုတေသီအဖြစ် သတ်မှတ်ခံထားရတဲ့ ပါမောက္ခ Nakamura Masatoshi ရဲ့ လေ့လာတွေ့ရှိချက်အသစ်ကတော့ တော်တော်လေး အံ့အားသင့်စရာကောင်းပါတယ်။

အဓိကက တစ်ခါလုပ်ရင် ဘယ်လောက်ကြာကြာလုပ်လဲဆိုတာထက် တစ်ပတ်စာ စုစုပေါင်းလုပ်တဲ့အချိန် (Total Volume) က ပိုအရေးကြီးတယ်တဲ့။ ကြွက်သားတစ်စုအတွက် တစ်ပတ်ကို ၁၀ မိနစ် (စက္ကန့် ၆၀၀) ဆိုရင် လုံလောက်ပြီ။ အဲ့ဒီထက်ပိုလုပ်လည်း ထူးပြီးပိုမပျော့လာတော့ဘူးလို့ ဆိုပါတယ်။

တစ်ပတ်ကို ၁၀ မိနစ်ဆိုတော့ နေ့တိုင်းလုပ်မယ်ဆို တစ်နေ့ကို ၈၆ စက္ကန့်လောက်ပဲ။ မနက်၊ နေ့လယ်၊ ည တစ်ခါလုပ်ရင် စက္ကန့် ၃၀ နဲ့ ၃ ခါဆို ရပြီ။ ဂျပန်မှာလို အလုပ်များတဲ့သူတွေအတွက်တော့ လိုက်လုပ်ဖို့ တော်တော်အဆင်ပြေတာပေါ့။

ဒါပေမဲ့ စနေ၊ တနင်္ဂနွေမှ အကုန်စုလုပ်မယ်ဆိုတဲ့ ပုံစံမျိုးတော့ မလုပ်နဲ့ဦး။ ၃ ရက်ထက်ပိုပြီး မလုပ်ဘဲထားလိုက်ရင် ပျော့ပြောင်းသွားတာတွေက မူလအတိုင်း ပြန်ဖြစ်သွားတတ်လို့ ရှေ့တစ်လှမ်းတိုး၊ နောက်နှစ်လှမ်းဆုတ် ဖြစ်နေပါလိမ့်မယ်။

အကြောဆန့်တာက ပျော့ဖို့တစ်ခုတည်းမဟုတ်ဘူး

အကြောဆန့်ခြင်းရဲ့ အကျိုးကျေးဇူးတွေက ခြေထိပ်ဖျားကို လက်နဲ့ထိနိုင်တာထက် အများကြီးပိုပါတယ်။ အလုပ်ကပြန်လာလို့ စိတ်ဖိစီးနေတဲ့အချိန်၊ လူကျပ်တဲ့ရထားကြီးစီးပြီး စိတ်ညစ်နေတဲ့အချိန်မျိုးမှာ အကြောနည်းနည်းဆန့်လိုက်တာနဲ့ စိတ်တွေ ကြည်လင်လန်းဆန်းသွားစေပါတယ်။

ဒါ့အပြင် သွေးတိုးကိုပါ ကျစေတယ်ဆိုတာ အံ့ဩစရာပဲ။ လေ့လာမှုတစ်ခုမှာ သွေးပေါင်ချိန်များတဲ့သူတွေကို တစ်နေ့ မိနစ် ၃၀၊ တစ်ပတ် ၅ ရက်နဲ့ ၈ ပတ်ကြာ အကြောဆန့်ခိုင်းတဲ့အခါ မြန်မြန်လမ်းလျှောက်တာထက်တောင် သွေးပေါင်ချိန်ကို ပိုကျစေတယ်လို့ တွေ့ရှိခဲ့ပါတယ်။

နောက်တစ်ချက်က အသက်ဘယ်လောက်ကြီးကြီး စလုပ်လို့ရတာပဲ။ အသက် ၈၀-၉၀ အရွယ် လူကြီးတွေတောင် အကြောဆန့်လို့ ပျော့ပြောင်းလာတယ်ဆိုတဲ့ သက်သေတွေရှိနေတာဆိုတော့ ကျွန်တော်တို့လို လူငယ်တွေအတွက် အကြောင်းပြစရာမရှိတော့ဘူးပေါ့။

အားကစားလုပ်တဲ့အခါ သတိထားရမှာတွေ

အားကစားလုပ်တဲ့အခါ အကြောဆန့်တာနဲ့ပတ်သက်ပြီး လူအတော်များများ သိထားတာတွေက မှားနေနိုင်ပါတယ်။

အားကစားမလုပ်ခင်မှာ အချိန်အကြာကြီး (စက္ကန့် ၆၀ ထက်ပိုပြီး) အကြောဆန့်တာက ကြွက်သားအားကို ခဏတာ ကျသွားစေနိုင်တယ်တဲ့။ ဒါကြောင့် အားကစားမလုပ်ခင်မှာ အကြာကြီးဆန့်တာမျိုး ရှောင်သင့်ပါတယ်။

အားကစားလုပ်ပြီးချိန်မှာရော။ အကြောဆန့်လိုက်ရင် ကြွက်သားနာတာ သက်သာတယ်လို့ ထင်ကြပေမယ့် သုတေသနတွေအရတော့ အဲ့လိုမဟုတ်ပါဘူးတဲ့။ စိတ်ကိုလန်းဆန်းစေတာကလွဲရင် ကြွက်သားနာတာကိုတော့ မသက်သာစေပါဘူး။ အချိန်မရရင် အကြောဆန့်မယ့်အစား အဲ့ဒီအချိန်ကို ရေနွေးနဲ့စိမ်ချိုးတာ၊ ဒါမှမဟုတ် အိပ်ချိန်ပိုယူတာက ကြွက်သားအတွက် ပိုတောင်ကောင်းသေးတယ်လို့ ဆိုပါတယ်။