ဂျပန်မှာ ကွာရှင်းဖူးတဲ့အမျိုးသားတွေက ဘာလို့ပိုလူကြိုက်များနေတာလဲ

ဂျပန်မှာ အသက် ၄၀ ကျော် ကွာရှင်းဖူးတဲ့အမျိုးသားက အပျိုကြီးရှာနေတဲ့လူထက်တောင် အိမ်ထောင်ဖက်ပိုရှာလွယ်နေတယ်တဲ့။

အဖြစ်အပျက်က ဒီလို

ကျွန်တော်တို့အများစုက ကွာရှင်းဖူးတယ် (ဂျပန်လို バツイチ) ဆိုရင် နောက်အိမ်ထောင်ပြုဖို့ ခက်သွားပြီလို့ ထင်ကြတာပေါ့နော်။ ဂျပန်လို ရှေးရိုးစွဲဆန်တဲ့နိုင်ငံမှာဆို ပိုတောင်ဆိုးဦးမယ်။ ဒါပေမယ့် အခုခေတ်မှာ အဲ့လိုမဟုတ်တော့ဘူးတဲ့ဗျ။

ဆူဂူရု (နာမည်လွှဲ) ဆိုတဲ့ အသက် ၄၁ နှစ်အရွယ် အမျိုးသားတစ်ယောက်ရဲ့ ဇာတ်လမ်းက နားထောင်ကြည့်ပါ။ သူက အသက် ၃၈ နှစ်အထိ ရည်းစားတစ်ခါမှမထားဖူးဘူး။ အိမ်ထောင်ဖက်ရှာပေးတဲ့ agency မှာ ၃ နှစ်လောက် အသည်းအသန်ကြိုးစားပြီးမှ နောက်ဆုံးတော့ အိမ်ထောင်ကျသွားတယ်။

ဒါပေမယ့် ကံဆိုးချင်တော့ လက်ထပ်ပြီး တစ်လတည်းနဲ့ပဲ အတွေးအခေါ်မတိုက်ဆိုင်လို့ ကွာရှင်းလိုက်ရတယ်။ တော်တော်တော့ ထူးဆန်းတယ်နော်။ 😂

ဘာလို့ အဲ့လိုဖြစ်သွားရတာလဲ

စိတ်ဓာတ်ကျသွားပေမယ့် ဆူဂူရုက "ဘဝလက်တွဲဖော်တစ်ယောက်တော့ တကယ်လိုချင်တယ်" ဆိုပြီး အဲ့ဒီ agency မှာပဲ နောက်တစ်ခေါက် ထပ်ကြိုးစားဖို့ ဆုံးဖြတ်လိုက်တယ်။

အံ့ဩစရာကောင်းတာက ဒုတိယအကြိမ်ကြိုးစားမှုမှာ သူ့ရဲ့ profile ကို တင်လိုက်တာနဲ့ မိန်းကလေးတွေဆီက တွေ့ဆုံဖို့ကမ်းလှမ်းချက်တွေ တန်းစီနေတော့တာပဲ။ သူ့ရဲ့ဝင်ငွေတို့ ဘာတို့ကလည်း ပိုကောင်းသွားတာမဟုတ်ဘူး။ "ကွာရှင်းဖူးသူ" ဆိုတဲ့ အချက်တစ်ချက်တောင် ပိုလာသေးတယ်။

အကြောင်းရင်းကတော့ ဂျပန်အမျိုးသမီးတွေရဲ့အမြင်မှာ ကွာရှင်းဖူးတယ်ဆိုတာက "အနည်းဆုံးတော့ ဒီလူကို တစ်ယောက်ယောက်က လက်ခံခဲ့ဖူးတယ်၊ အိမ်ထောင်ဖက်အဖြစ် ရွေးချယ်ခဲ့ဖူးတယ်" ဆိုတဲ့ အာမခံချက်ကြီးတစ်ခုလို ဖြစ်နေလို့ပါတဲ့။ အသက် ၃၀၊ ၄၀ ကျော်တဲ့အထိ ရည်းစားမထားဖူး၊ အိမ်ထောင်မပြုဖူးတဲ့လူဆိုရင် "သူ့မှာ ပြဿနာကြီးကြီးမားမားများ ရှိနေမလား" ဆိုပြီး သံသယဝင်တတ်ကြတယ်လေ။

ဒါဆိုရင်တော့…

"ကွာရှင်းဖူးသူ" ဆိုတဲ့တံဆိပ်က သူ့အတွက် "တခြားလူနဲ့ အတူတူနေထိုင်နိုင်တဲ့ လူသားတစ်ယောက်ဖြစ်ကြောင်း အာမခံလက်မှတ်" လို ဖြစ်သွားတာပေါ့။ အဲ့ဒီလိုနဲ့ ကိုယ့်ကိုယ်ကို ယုံကြည်မှုတက်လာတဲ့ ဆူဂူရုက ပထမအကြိမ်တုန်းကလို မဟုတ်တော့ဘဲ ပေါ့ပေါ့ပါးပါးနဲ့ အမျိုးသမီးတွေနဲ့ စကားပြောနိုင်လာတယ်။

အရင် ၃ နှစ်တာအတွေ့အကြုံနဲ့ ကွာရှင်းခဲ့ရတဲ့သင်ခန်းစာတွေက သူ့ကို ပိုပြီးရင့်ကျက်စေခဲ့တယ်။ နောက်ဆုံးတော့ ဒုတိယအကြိမ်ကြိုးစားမှုရဲ့ ၉ လအကြာမှာ သူ့ကိုနားလည်ပေးနိုင်တဲ့ အမျိုးသမီးကောင်းတစ်ယောက်နဲ့ လက်ထပ်သွားနိုင်ခဲ့ပါတယ်။

အရင်တုန်းက "ဘဝရဲ့အမာရွတ်" လို့ သဘောထားခဲ့ကြတဲ့ ကွာရှင်းပြတ်စဲခြင်းက အခုတော့ "လူတစ်ယောက်နဲ့ လေးလေးနက်နက် ပေါင်းသင်းဆက်ဆံဖူးတဲ့ အတွေ့အကြုံ" အဖြစ် ပြောင်းသွားပြီပေါ့။ ဂျပန်ရဲ့ dating လောကကတော့ တကယ့်ကို စနစ်တကျပါပဲဗျာ။