ဂျပန်မှာ PR လျှောက်ဖို့ လစာ ၄ သိန်း ၈ သောင်းနီးပါး လိုမယ်တဲ့လား

ဂျပန်မှာ PR လိုချင်ရင် တစ်လကို ယန်း ၄ သိန်း ၈ သောင်းနီးပါး ဝင်ငွေရှိမှဆိုတဲ့ သတင်းကတော့ အိပ်မက်တွေကို ရိုက်ချိုးလိုက်သလိုပါပဲ။

ဘာတွေဖြစ်ကုန်တာလဲ

ဂျပန်မှာ နေထိုင်ရတာ အသားကျလာပြီ၊ အရာရာ အဆင်ပြေနေပြီလို့ ထင်တဲ့အချိန်တိုင်း ဂျပန်က "ခဏလေးနော်" ဆိုပြီး အသစ်အဆန်းတွေ ထုတ်ပြတတ်တယ်။ အခုတစ်ခါတော့ Permanent Resident (PR) လျှောက်ချင်တဲ့ ကျွန်တော်တို့လို နိုင်ငံခြားသားတွေအတွက် စည်းမျဉ်းအသစ်တွေ တင်းကျပ်ဖို့ လုပ်နေပြန်ပါပြီ။

အဓိကအချက်ကတော့ ဝင်ငွေပါ။ တစ်နှစ်ဝင်ငွေက ဂျပန်မိသားစုတစ်စုရဲ့ ပျမ်းမျှဝင်ငွေထက် ပိုများရမယ်တဲ့။ အခုနောက်ဆုံးစစ်တမ်းအရဆိုရင် တစ်နှစ်ကို ယန်း ၅.၇၅ သန်း၊ တစ်လကိုဆိုရင် ယန်း ၄၇၉,၀၀၀ (၄ သိန်း ၈ သောင်းနီးပါး) ဖြစ်ပါတယ်။

ဒီသတင်းကြားပြီး ကိုယ့်ရဲ့လစာ明細 (payslip) လေးကို ပြန်ကြည့်ရင်း သက်ပြင်းချမိတာ ကျွန်တော်တစ်ယောက်တည်းတော့ မဟုတ်လောက်ဘူးထင်တယ်။

ပိုက်ဆံတင် မဟုတ်ဘူးနော်

ဝင်ငွေတစ်ခုတည်းနဲ့ မပြီးသေးပါဘူး။ အသက်ကြီးလာရင် ကိုယ့်ကိုယ်ကိုယ် ထောက်ပံ့နိုင်မလားဆိုတာကိုလည်း ကြည့်ဦးမှာတဲ့။

ဆိုလိုတာက သင်ရဲ့အနာဂတ်ပင်စင်လစာက ဂျပန်ပင်စင်ကို နှစ် ၃၀ ကြာ ပေးသွင်းထားတဲ့သူတစ်ယောက်ရမယ့်နှုန်းလောက် ရှိ၊ မရှိ စစ်ဆေးမယ်ဆိုတဲ့ သဘောပါပဲ။

ပင်စင်က မလုံလောက်ဘူးဆိုရင်ရော? ဘဏ်ထဲမှာ ပိုက်ဆံဘယ်လောက်ရှိလဲ၊ စတော့ရှယ်ယာတွေ ဘာတွေ ဝယ်ထားသေးလဲဆိုတာတွေနဲ့ ပြန်ဖြည့်ပေးနိုင်မလားဆိုတာကိုပါ ကြည့်ဦးမှာတဲ့။ ဂျပန်မှာ PR ရပြီးမှ အစိုးရ လူမှုဖူလုံရေးကို အားကိုးမှာစိုးလို့ ကြိုတင်ကာကွယ်တဲ့ သဘောမျိုးပေါ့။

နောက်ထပ် ဘာတွေလိုသေးလဲ

ဒါ့အပြင် ဂျပန်ဘာသာစကား အရည်အချင်း၊ ဂျပန်ရဲ့ လူနေမှုစည်းကမ်းတွေကို နားလည်လိုက်နာမှု (ဟုတ်ပါတယ်၊ အမှိုက်ပစ်တဲ့ စည်းကမ်းတွေပါ ပါတာပေါ့) နဲ့ ကလေးတွေရဲ့ ကျောင်းတက်မှန်၊ မမှန်ကိုပါ ထည့်သွင်းစဉ်းစားသွားဖို့ ရှိနေပါတယ်။

ဒီစည်းမျဉ်းအသစ်တွေကို ဘယ်တော့စမလဲဆိုတာကတော့ သတင်းဌာနတွေပေါ်မူတည်ပြီး အတိအကျမတူသေးဘူး။ တချို့က ဒီနှစ် အောက်တိုဘာမှာ ဝင်ငွေစည်းကမ်းစမယ်ပြောပြီး တချို့ကတော့ ဧပြီလကတည်းက လျှောက်ထားတဲ့သူတွေကိုပါ အကျုံးဝင်တယ်လို့ ဆိုနေပြန်ရော။

PR ဆိုတဲ့ စကားလုံးလေးက တဖြည်းဖြည်းနဲ့ အလှမ်းဝေးတဲ့ တိမ်တိုက်တစ်ခုလို ဖြစ်လာသလိုပဲ 🥲။