ဦးနှောက်ကို ၆ နှစ်ပိုနုပျိုစေမယ့် နေ့လယ်ခင်းတစ်ရေးအိပ်ခြင်း

နေ့ခင်းဘက် ခဏအိပ်ရုံနဲ့ ဦးနှောက်အိုမင်းတာကို ၆ နှစ်လောက် နှေးကွေးစေတယ်ဆိုတဲ့ သုတေသနအသစ် ထွက်လာပါတယ်။

ဒါက ဘာအကြောင်းလဲဗျ

UK က သုတေသီတစ်ယောက်ဖြစ်တဲ့ Dr. Victoria Garfield က တွေ့ရှိခဲ့တာပါ။ နေ့ခင်းဘက် တစ်ရေးအိပ်တတ်တဲ့သူတွေရဲ့ ဦးနှောက်ဟာ မအိပ်တဲ့သူတွေထက် 15 ကုဗစင်တီမီတာ ပိုကြီးတယ်တဲ့။ Plum သီးသေးသေးလေးတစ်လုံးစာလောက်ပေါ့။

ဒီလို ဦးနှောက်အရွယ်အစားကြီးတာကြောင့် အိုမင်းမှုကို ၆ နှစ်လောက်တောင် နှောင့်နှေးစေနိုင်တယ်လို့ ဆိုပါတယ်။ ကျွန်တော်တို့လို ဂျပန်မှာ မနားမနေ အလုပ်လုပ်နေရတဲ့သူတွေအတွက်တော့ သတင်းကောင်းပဲပေါ့။ 😂

ဘယ်လောက်ကြာကြာ အိပ်ရမှာလဲ

အကောင်းဆုံးကတော့ မိနစ် ၃၀ ထက်မပိုတဲ့ တစ်ရေးအိပ်စက်ခြင်းပါပဲ။ အဲ့ထက်ပိုအိပ်ရင် နိုးလာတဲ့အခါမှာ ခေါင်းကမကြည်မလင်ဖြစ်ပြီး ပိုလို့တောင် အူကြောင်ကြောင်ဖြစ်သွားနိုင်ပါတယ်။

မိနစ် ၃၀ လောက်ကတော့ ဦးနှောက်စွမ်းဆောင်ရည်ကို ချက်ချင်းပြန်လည်တက်ကြွစေပြီး ခေါင်းကို ကြည်လင်သွားစေပါတယ်။ ဒါပေမယ့် ဒီအာနိသင်က ကြာကြာမခံပါဘူး။ ဒါကြောင့် နေ့တိုင်း ခဏတာအိပ်စက်တဲ့အကျင့်လေးလုပ်ပေးဖို့ သုတေသီတွေက အကြံပြုထားပါတယ်။

အလုပ်မှာ ဘယ်လိုအိပ်မလဲ

ဒါကတော့ အဓိကအချက်ပဲ။ သုတေသီတွေကတော့ နေ့လည်စာစားချိန်မှာ အိပ်ဖို့ အကြံပေးထားတယ်။ ဒါမှမဟုတ် အလုပ်တစ်ဝက်လောက်ပြီးတဲ့အချိန်ပေါ့။

စိတ်ကူးထဲမှာတော့ ကိုယ့်ရဲ့ ဂျပန် 部長 (bucho) ကို "UK က သုတေသနအရ ကျွန်တော် မိနစ် ၃၀ လောက် အိပ်မှဖြစ်မယ်" လို့ သွားပြောလိုက်တာပေါ့။ လက်တွေ့မှာတော့ အဲ့လိုသွားပြောလိုက်ရင် ဘာဆက်ဖြစ်မလဲဆိုတာကတော့... ကိုယ့်ဘာသာ စဉ်းစားကြည့်တော့ဗျာ။

လောလောဆယ်တော့ ကုမ္ပဏီက တရားဝင်ခွင့်ပြုပေးမယ့် နေ့လည်ခင်းအိပ်ချိန်ဆိုတာကတော့ အိပ်မက်တစ်ခုလိုပါပဲ။ Yamanote လိုင်းပေါ်မှာ ခေါင်းလေးစိုက်ပြီး ခဏမှေးရတာနဲ့ပဲ ကျေနပ်နေရဦးမှာပေါ့။