ဂျပန်မှာ ချွေးနံ့ပျောက်ဆေး ဘာလို့ရှားတာလဲ

ဂျပန်က ဆေးဆိုင်တွေမှာ ချွေးနံ့ပျောက်ဆေး ဘာလို့ဒီလောက်နည်းရတာလဲ သိချင်ဖူးလား။

ဂျပန်မှာ ဘာလို့ ဒီလိုဖြစ်နေရတာလဲ

ဂျပန်ရောက်ခါစက ဆေးဆိုင်တွေ၊ ဒွန်ကိဟိုတဲ (Don Quijote) တွေမှာ ချွေးနံ့ပျောက်ဆေး (deodorant) ရှာရတာ အတော်ခက်တာကို ကျွန်တော်သတိထားမိတယ်။ ရှိတော့ရှိတယ်၊ ဒါပေမဲ့ ရွေးစရာက ၄-၅ မျိုးလောက်ပဲ။ ကိုယ့်နိုင်ငံမှာလို စင်အပြည့်ခင်းထားတာမျိုး မဟုတ်ဘူး။

ဒါက ဂျပန်လူမျိုးတွေက သန့်ရှင်းကြလို့၊ ရေများများချိုးလို့ ချွေးနံ့မထွက်တာလို့ ထင်ခဲ့တာ။ တကယ်တော့ အဲ့ထက်ပိုနက်နဲတဲ့ ဇီဝဗေဒဆိုင်ရာ အကြောင်းပြချက်တစ်ခု ရှိနေသတဲ့ဗျ။ အဓိကတရားခံက မျိုးဗီဇ (gene) တစ်ခုကြောင့်ပါတဲ့။

နားဖာချေးက ပြောပြတဲ့ သင့်ရဲ့ကိုယ်နံ့

ကြားရတာ ထူးဆန်းပေမဲ့ လူတစ်ယောက်ရဲ့ ကိုယ်နံ့ပြင်းမပြင်းက သူ့ရဲ့နားဖာချေးအမျိုးအစားပေါ်မှာ မူတည်နေတယ်တဲ့။ ABCC11 လို့ခေါ်တဲ့ မျိုးဗီဇက ဒီနှစ်ခုလုံးကို ထိန်းချုပ်ထားတာပါ။

ရိုးရိုးလေးပြောရရင် နားဖာချေးက ခြောက်သွေ့ပြီး အဖတ်လေးတွေပုံစံ (dry) ဆိုရင် သင်က ကိုယ်နံ့မရှိတဲ့ မျိုးဗီဇပိုင်ရှင်ပဲ။ ဒီမျိုးဗီဇက ဂျပန်၊ ကိုရီးယား၊ တရုတ်လို အရှေ့အာရှနိုင်ငံတွေမှာ အင်မတန် အဖြစ်များတယ်။ ကိုရီးယားလူမျိုး ၁၀၀% နီးပါးက ဒီအမျိုးအစားတဲ့။ ဒါကြောင့် သူတို့ဆီမှာ ချွေးနံ့ပျောက်ဆေးဆိုတာ သိပ်မသုံးကြဘူး။

အကယ်၍ နားဖာချေးက စိုစွတ်ပြီး စေးကပ်တဲ့ပုံစံ (wet) ဆိုရင်တော့ သင်က ကိုယ်နံ့ထွက်တတ်တဲ့ မျိုးဗီဇရှိသူပေါ့။ ဒီအမျိုးအစားကတော့ အာဖရိကနဲ့ ဥရောပတိုက်သားတွေမှာ အဖြစ်အများဆုံးပဲ။ အဲ့တော့ ဂျပန်က deodorant စင်သေးသေးလေးတွေက သူတို့အတွက်တော့ အဆင်မပြေလောက်ဘူး။ 🤔

ကဲ… မြန်မာတွေကရော ဘယ်အုပ်စုထဲမှာလဲ

စိတ်ဝင်စားစရာက အိမ်နီးချင်း ဗီယက်နမ်လူမျိုးတွေရဲ့ စာရင်းဇယားအရ ၅၄% က နားဖာချေးခြောက်ပြီး ကိုယ်နံ့မရှိတဲ့ (AA) မျိုးဗီဇ၊ ၃၉% က နားဖာချေးနည်းနည်းစိုပြီး ကိုယ်နံ့အနည်းငယ်ရှိတဲ့ (GA) မျိုးဗီဇ၊ ပြီးတော့ ၇% က နားဖာချေးတော်တော်စိုပြီး ကိုယ်နံ့ပြင်းတဲ့ (GG) မျိုးဗီဇ ရှိကြတယ်တဲ့။

အရှေ့တောင်အာရှသားတွေဖြစ်တဲ့ ကျွန်တော်တို့ မြန်မာတွေလည်း ဒီရာခိုင်နှုန်းတွေနဲ့ အများကြီးကွာမယ်မထင်ပါဘူး။ ဆိုတော့ ကိုယ့်ပတ်ဝန်းကျင်က မြန်မာ ၁၀ ယောက်မှာ ၄-၅ ယောက်လောက်က ချွေးထွက်ရင် ကိုယ်နံ့ထွက်နိုင်ခြေရှိတယ်ဆိုတဲ့ သဘောပဲ။ အခုပဲ ကိုယ့်နားကို သွားမစစ်နဲ့ဦးနော်။

ကိုယ့်နားဖာချေးက ခြောက်လား၊ စိုလားဆိုတာ ကိုယ်တိုင်မသေချာရင်တော့ သူငယ်ချင်းတစ်ယောက်ယောက်ကို အကူအညီတောင်းကြည့်ပေါ့။ ဒါမှမဟုတ် gym ဆော့ပြီး ချွေးတွေရွှဲနေတုန်း ဘေးက ဂျပန်သူငယ်ချင်းကို "ငါ့ကိုယ်နံ့ရလား" လို့မေးကြည့်လိုက်။ သူတို့ရဲ့ ပြာပြာသလဲ "大丈夫ですよ (daijoubu desu yo)" ဆိုတဲ့ အမူအရာနဲ့ အဖြေကို သင်သိလာပါလိမ့်မယ်။