ဂျပန်အမဲသားထက် သြဇီအမဲသားက ပိုဈေးကြီးနေပြီတဲ့လား

စူပါမားကတ်မှာ ဈေးဝယ်ရင်း မျက်စိမှားတယ်ထင်သွားတယ်၊ နိုင်ငံခြားဖြစ်က ပြည်တွင်းဖြစ်ထက် ပိုဈေးကြီးနေလို့။

ဘာတွေဖြစ်ကုန်တာလဲ

အရင်က နိုင်ငံခြားဖြစ်ဆိုရင် ဈေးသက်သာတဲ့ ပစ္စည်းဆိုပြီး အားလုံးနားလည်ထားကြတာလေ။ အခုတော့ အဲ့ဒီခေတ်က ကုန်သွားပြီထင်တယ်။ ဂျပန်မှာ ဈေးဝယ်ရတာ တစ်နေ့တစ်မျိုး မရိုးရဘူးပဲ။

အခုဖြစ်နေတာက ပြောင်းပြန်ဖြစ်ရပ်ကြီးပေါ့။ Aichi ခရိုင်က စူပါမားကတ်တစ်ခုမှာ သြစတြေးလျကလာတဲ့ အမဲသားတုံးက ဂျပန်ပြည်တွင်းဖြစ် အမဲသားတုံးထက် ဂရမ် ၁၀၀ ကို ယန်း ၁၂၀ လောက် ပိုဈေးကြီးနေတယ်။ ကျွန်တော်တို့လို ချွေတာရေးသမားတွေအတွက်တော့ ဦးနှောက်ခြောက်စရာပဲ။ 😵

အမဲသားတင်ပဲလားဆိုတော့ မဟုတ်ဘူးဗျ။ နော်ဝေကလာတဲ့ ဆားစိမ်ငါးသေတ္တာကတောင် ပြည်တွင်းဖြစ်ထက် ဂရမ် ၁၀၀ ကို ယန်း ၅၀ ပိုများနေပါရောလား။

ဘာလို့ဒီလိုဖြစ်ရတာလဲ

တရားခံကတော့ အားလုံးသိတဲ့အတိုင်းပဲ၊ လွန်ခဲ့တဲ့ နှစ် ၄၀ နီးပါးအတွင်း အနိမ့်ဆုံးဖြစ်နေတဲ့ "ယန်းဈေးကျခြင်း" (円安) ပါပဲ။ ဒေါ်လာဈေးက တက်၊ ယန်းဈေးကကျနဲ့ဆိုတော့ သွင်းကုန်တွေရဲ့ ဝယ်ဈေးကလည်း တရိပ်ရိပ်တက်လာတာပေါ့။

စူပါမားကတ်ရဲ့ မန်နေဂျာတောင် ပြောသွားသေးတယ်။ "ဒီလိုဈေးမျိုးဖြစ်လာမယ်လို့ ဘယ်တုန်းကမှ မတွေးခဲ့ဖူးဘူး" တဲ့။ ဟုတ်တယ်လေ၊ အရင်ကဆို နိုင်ငံခြားဖြစ် ဝက်သား ၁၀၀ ဂရမ်ကို ယန်း ၁၀၀ အောက်နဲ့ ရခဲ့တဲ့အချိန်တွေ ရှိခဲ့ဖူးတာပဲ။ အခုတော့ အဲ့ဒါတွေက အိပ်မက်တစ်ခုလိုပါပဲ။

ဒီတော့ ဘာဆက်လုပ်ရမလဲ

ဒီတော့ ပြည်တွင်းဖြစ်ပဲစားတော့မယ်ဆိုတော့လည်း ပြည်တွင်းဖြစ်ကလည်း ဈေးတက်နေတာဆိုတော့… နှစ်ခုလုံးဈေးတက်နေတဲ့သဘောပေါ့။ ဘယ်ဟာဝယ်ဝယ် ကိုယ့်ပိုက်ဆံအိတ်ကတော့ အထိနာတာပါပဲ။

လေ့လာချက်တွေအရ ဝင်ငွေအပေါ်မူတည်ပြီး တစ်နှစ်ကို ယန်း ၁၅,၀၀၀ ကနေ ၂၄,၀၀၀ ကြား အသုံးစရိတ်ပိုများလာနိုင်တယ်လို့ ဆိုပါတယ်။ တစ်လကို ယန်း ၁၀၀၀ ကျော် ပိုသုံးရမယ့် သဘောပေါ့။

ယန်းဈေးကျလို့ ဒေဝါလီခံရတဲ့ ကုမ္ပဏီတွေတောင် ရှိလာနေပြီဆိုတော့ ကိုယ့်အလုပ်လစာကို မထိခိုက်လာခင် လစဉ်အသုံးစရိတ်ကို ပြန်ပြီး တွက်ချက်ထားမှပဲ ဖြစ်တော့မယ်။