ဂျပန်မှာ စားစရာဈေးတွေ ထပ်တက်ဦးမယ်တဲ့ဗျို့။

ပိုက်ဆံအိတ်လေး အသက်ရှူချောင်ခါစရှိသေးတယ်၊ ဈေးနှုန်းတွေက ထပ်တက်ဖို့ တန်းစီနေကြပြန်ပြီ။

ဘာတွေထပ်ဈေးတက်မှာလဲ

ဂျပန်ရဲ့ နွေရာသီက အပူချိန်ပဲတက်တာမဟုတ်ဘူးဗျ။ ဈေးနှုန်းတွေပါ လိုက်တက်လာပြန်ပြီ။ 😥

ဇူလိုင်လကစပြီး ပစ္စည်းပေါင်း ၂၅၆၆ မျိုး ဈေးတက်မယ်လို့ သတင်းတွေထွက်နေပါတယ်။ ဟုတ်ပါတယ်၊ ၂၅၀၀ ကျော်တောင်ပါ။

အဆိုးဆုံးကတော့ ကျွန်တော်တို့ရဲ့ အသက်ကယ်သမားတွေဖြစ်တဲ့ "ပေါင်မုန့်" နဲ့ "ခေါက်ဆွဲခြောက်" တွေ အဓိကပါနေတာပါပဲ။ ပေါင်မုန့်ဆို အမျိုးအစား ၁၀၀၀ ကျော်၊ ခေါက်ဆွဲခြောက်အပါအဝင် အသင့်စားအစားအစာတွေကလည်း ၁၀၀၀ ကျော် ဈေးတက်မယ့်စာရင်းထဲမှာ ပါနေတယ်။

တချို့ဆို ၅% ကနေ ၁၅% အထိ တက်နိုင်တယ်ဆိုတော့ မနက်စာအတွက် ပေါင်မုန့်ဝယ်တိုင်း၊ ညမိုးချုပ်မှ ဗိုက်ဆာလို့ ခေါက်ဆွဲပြုတ်စားတိုင်း သက်ပြင်းချရတော့မယ့်ကိန်းပါပဲ။

ဘာလို့ဒီလိုဖြစ်ရတာလဲ

အကြောင်းရင်းကတော့ အရင်အတိုင်းပါပဲ။ ကုန်ကြမ်းဈေး၊ သယ်ယူပို့ဆောင်စရိတ်တွေ တက်တာအပြင်၊ အရှေ့အလယ်ပိုင်းအခြေအနေတွေကြောင့် ရေနံဈေးပါလိုက်တက်လာတာက မီးလောင်ရာလေပင့်ဖြစ်သွားစေတာပေါ့။

ဈေးဝယ်သူတွေရဲ့ မျက်နှာမကောင်းတာကိုကြည့်ပြီး စိတ်မကောင်းဘူးလို့ စူပါမားကတ် မန်နေဂျာတစ်ယောက်ကတောင် ညည်းထားသေးတယ်။

ဂျပန်လူမျိုးအဘိုးတစ်ယောက်ကတော့ ဈေးသက်သာတာတွေပဲ ရွေးဝယ်ပြီး ခြွေတာနေရတယ်လို့ ဆိုပါတယ်။ နောက်တစ်ယောက် အိမ်ထောင်ရှင်အမျိုးသမီးပြောတာက ပိုပြီးမှတ်သားစရာ။ "ကလေးတွေအတွက်ပဲ အဓိကထားပြီး လူကြီးတွေကြိုက်တာကိုတော့ လျှော့ရမှာပေါ့... ဥပမာ ခင်ပွန်းရဲ့ ဘီယာဖိုးတို့ဘာတို့ပေါ့" တဲ့။ ကြားလိုက်ကြတယ်ဟုတ်။ 😂

ရှေ့ဆက်ဘာဖြစ်မလဲ

ဒီဇာတ်လမ်းက ဇူလိုင်လမှာတင် မပြီးသေးပါဘူး။ ဩဂုတ်လမှာ ပစ္စည်း ၁၉၀၀ ကျော်၊ စက်တင်ဘာလမှာတော့ အများဆုံးဖြစ်မယ့် ပစ္စည်း ၃၀၀၀ လောက် ဈေးထပ်တက်ဖို့ ရှိနေပါသေးတယ်။

ဒီနွေရာသီကတော့ ဈေးဝယ်တိုင်း ဈေးနှုန်းတက်ဘ်ကို နှစ်ခါပြန်ကြည့်ရမယ့် နွေရာသီမျိုး ဖြစ်လာမယ့်ပုံပါပဲ။ သူငယ်ချင်းတစ်ယောက်ယောက်ကို ကိုယ့်ရဲ့ ခေါက်ဆွဲခြောက်တစ်ထုပ်လောက် ဝယ်ကျွေးဖို့ စဉ်းစားနေတယ်ဆိုရင် အခုပဲ ဝယ်ကျွေးလိုက်တော့နော်။ နောက်ကျရင် ခက်သွားနိုင်တယ်။