Zairyu ကတ်အသစ်ကိုင်လို့ ရှီဘူယားမှာ အဖမ်းခံရတဲ့အခါ

ရှီဘူယားမှာ ရဲက ကိုင်ထားတဲ့ Zairyu ကတ်က "အတု" ဆိုပြီး နိုင်ငံခြားသားတစ်ဦးကို ဖမ်းဆီးလိုက်ပါတယ် — အဲ့ကတ်က အစိုးရထုတ် ပုံစံအသစ်ဖြစ်နေတာကလွဲလို့ပေါ့။

ဘာဖြစ်ခဲ့တာလဲ

ဂျပန်မှာ ရဲတွေက လမ်းပေါ်မှာတွေ့တဲ့သူကို ရပ်တန့်ပြီး ID စစ်ဆေးမေးမြန်းတဲ့ "職務質問 (shokumu shitsumon)" ဆိုတာရှိတယ်လေ။ အဲ့ဒါက တရားဝင်တော့ ဟုတ်ပေမယ့် နိုင်ငံခြားသားတွေအတွက်တော့ နည်းနည်းအာရုံနောက်ရတဲ့ ကိစ္စတစ်ခုပေါ့။

ကြာသပတေးနေ့ မနက် ၁၀ နာရီ ၁၀ မိနစ်လောက်မှာ၊ လူအစည်ကားဆုံးနေရာတွေထဲက တစ်ခုဖြစ်တဲ့ ရှီဘူယား Hachiko Square ရှေ့မှာ နီပေါနိုင်ငံသား လူငယ်တစ်ဦးကို ရဲက ရပ်တားခဲ့တယ်။ သူ့ကို ရပ်တားရတဲ့အကြောင်းရင်းက ရဲကိုကြည့်ပြီး မြေကြီးပြန်ငုံ့ကြည့်လိုက်လို့တဲ့။ ရဲကို စိုက်ကြည့်နေပြန်ရင်လည်း သံသယဝင်စရာဖြစ်ဦးမှာဆိုတော့ ဘယ်လိုမှ ရှောင်လွှဲလို့မရတဲ့ အခြေအနေမျိုးပါပဲ။

ဘာလို့ အဖမ်းခံရတာလဲ

ရဲတွေက သူ့သူငယ်ချင်းရဲ့ Zairyu ကတ်ကို စစ်ကြည့်တော့ ပုံစံအဟောင်းမို့လို့ ဘာမှမဖြစ်ဘူး။ သူ့အလှည့်ကျတော့ ကတ်က ပန်းရောင်နဲ့ ခရမ်းရောင်အဆင်းနဲ့ ပုံစံအသစ်ဖြစ်နေတယ်။ ဖောင့်တွေ၊ ဒီဇိုင်းတွေက မတူတော့ ရဲအရာရှိနှစ်ယောက်က "အတု" လို့ တန်းဆုံးဖြတ်လိုက်တယ်။

အဲ့လူငယ်က ဒါကို အလုပ်ကနေ လွန်ခဲ့တဲ့ရက်ပိုင်းကမှ ရထားတာပါလို့ ရှင်းပြပေမယ့် လက်မခံခဲ့ဘူး။ နောက်ထပ် စုံထောက်နှစ်ယောက်ကို ထပ်ခေါ်ပြီး လေးယောက်လုံးက အတုလို့ သဘောတူညီလိုက်ကြတယ်။ ပြီးတော့ အဲ့နေရာမှာတင်ပဲ သူ့ကို ဖမ်းပြီး ရှီဘူယားရဲစခန်းကို ခေါ်သွားတော့တာပဲ။

နောက်ဆုံးတော့ ဘာဖြစ်သွားလဲ

ရဲစခန်းရောက်မှပဲ ငါးယောက်မြောက်အရာရှိ၊ immigration ကိစ္စတွေကို တကယ်နားလည်တဲ့သူတစ်ယောက်က ဝင်ကြည့်ပြီး ဒါက အစစ်အမှန် Zairyu ကတ်အသစ်ဖြစ်ကြောင်း အတည်ပြုပေးခဲ့တယ်။ Immigration Services Agency က ဇွန်လ ၁၄ ရက်နေ့ကမှ ဒီကတ်ပုံစံအသစ်ကို စပြီးထုတ်ပေးခဲ့တာပါ။

နောက်ဆုံးတော့ အဖမ်းခံရပြီး တစ်နာရီလောက်အကြာမှာ သူ့ကို ရဲစခန်းက ပြန်လွှတ်ပေးခဲ့ပြီး တောင်းပန်ခဲ့ပါတယ်။ ရဲစခန်းအကြီးအကဲက "နောက်ထပ် ဒီလိုမဖြစ်အောင် အရာရှိတွေကို သေချာလမ်းညွှန်ပေးပါ့မယ်" လို့ ပြောသွားတယ်။ ဌာနချုပ်ကတော့ ကတ်အသစ်အကြောင်း ကြိုတင်အကြောင်းကြားစာတွေ ပို့ထားတယ်လို့ ဆိုပေမယ့် အောက်ခြေထိ သတင်းမရောက်တာကတော့ ရှင်းနေတာပဲလေ။ 🤷